Mismo ang punong barangay sang Barangay 2, Bacolod City ang nagbukas sang karton nga nakita sang garbage collector kaina sang aga nga may unod sang container sang ice cream nga ginsudlan sang utod nga duha ka kamot.
Sa interview sang Bombo Radyo Bacolod kay Punong Barangay Emelda Banguanga, gintawag siya kaina pasado alas 6:00 ang takna sang aga sang personnel sang IPM CONSTRUCTION AND DEVELOPMENT CORP, ang garbage hauler sang syudad matapos makita ang karton kun sa diin nasulod ang plastic kag ang sulodlan sang ice cream.
Suno kay Banguanga, ginbuksan na sang garbage collector ang suludlan sang ice cream sa tinutuyo nga mapuslan pa nila ini apang gintawag ang iya atensyon sang nakita ang duha ka kamot.
Ginkadtuan niya man ini kag ginpicturan kag kasubong man nga nagcontact sa katapo sang Bacolod Police Station 2.
Suno kay Banguanga, santo sa nakita sini, magluwas sa kamot ang suludlan sang ice cream ang may unod man nga tinutok nga langka, batwan, ahos, patis kag langgaw kun sa diin daw kaangay nga ginmarinade na ang kamot.
Sa 1/4 size nga papel nakasulat ang kapin 22 ka mga pangalan sang mga tawo nga ginabanta mga residente man sang Barangay 2.
Suno kay Banguanga, familiar man sa iya ang nakasulat nga mga pangalan.
Sa idalom sang papel nakasulat pa ang tinaga nga “ MAGUNTAT NA KUN INDI, RAFFLE NALANG”.
Wala naman sang missing nga reported sa ila barangay.
Suno pa sa Punong Barangay, malayo sa CCTV ang basurahan kun sa diin nakita ang karton.
Samtang ginpahayag naman sang station commander sang Bacolod Police Station 2 nga ginkumpirmar sang katapo sang Scene of the Crime Operation (SOCO) nga kamot sang tawo ang ila nga nakita.
Ini bangod madamo sang nagapangayo sang kumpirmasyon sa kamatuoran sang naglapta nga balita.
Sa interview sang Bombo Radyo Bacolod kay Police Captain Jonito Pastrana, ang kamot ang wala ginluto apang ini ang ginsulod lamang sa sulodlan sang ice cream kag gin-impunan sang nilaga.
Suno kay Pastrana, nagfollow-up sila sang CCTV footage sa Barangay kun sa diin mga alas 2:30 tubtob alas 3:00 ang takna sang kaagahon may nagpondo nga puti nga van apang tuman kalayo gani indi makita kun ano ang plate number sang salakyan nga posible nagbilin sang gin-utod nga kamot.
Suno kay Pastrana natumod naman ang mga pangalan nga nasulat sa ¼ size nga papel nga mga residente sang Barangay 2 kag ang iban drug surrenderee samtang may iban naman nga wala na nagatinir sa nasambit nga Barangay bangud nagpangabuhi naman sa iban nga lugar.
Nagpanawagan man ini sa mga may ngalan nga nakasulat sa nasambit papel nga dapat seryuson sang mga ini ang paandam kag magbag-o na sa pagpangabuhi.
Padayon pa sa karun ang imbestigasyon sang Bacolod Police Station 2 sa nakita nga duha ka utod nga kamot agud nga makakuha sang lead nga makatudlo kun sin-o ang nagapanag-iya sang kamot kag ang motibo sa pag-utod sini.
