Ginpapanaugan sang 15 days preventive suspension ang inspector kag konduktor sang Vallacar Transit Incorporated nga nagviral matapos nagsumbanganay sa sulod sang ceres bus sa Iloilo.
Sa interview sang Bombo Radyo kay Jade Marquez, public information officer sang Vallacar Transit Incorporated, sang tinalikdan pa nga semana natabo ang insidente kag mangin sila ang wala nanamian diri.
Suno kay Marquez, nagsugod ang gamo bangud may isa ka pasahero nagikan sa Barotac Nuevo kag nagpaticket sa Zarraga apang nakalapaw na ini sa lugar kag siya ang wala pa nanaog.
Bangud diri, nashort ang konduktor kag nag-eksplikar sa inspector apang indi ini magpati.
Bangud sa wala nila ini maistoryahan sang maayo, nagtapungalay ang duha sa sulod sa ceres bus kag naghatag naman sang kakulba sa mga pasahero.
Suno diri, wala nila ginatolerar ang nasambit nga pamatasan sang empleyado kag gilayon nga ginpatawag sang admin manager kag investigator pag-abot sa terminal.
Pagkatapos sang imbestigasyon, ila ang mga ini ginpapanaugan sang 15 ka adlaw nga preventive suspension bilang kabahin sang disciplinary action.
Suno sa iya, yara sila sa public service nga field gani indi dapat maghimo ang mga ini sang butang nga makahatag sang kakulba sa mga pasahero.
Suno kay Marquez, dapat wala ang mga ini nagpadala sa ila mga balatyagon kag nagserbi nga maayo nga ehemplo.
Samtang,
Gin-athag sang public information officer sang Vallacar Transit Incorporated nga gindumilian sang management ang pagpatindog sa mga pasahero sa sulod sang ceres bus.
Suno kay Jade Marquez, dapat indi magpasugot ang mga pasahero nga patindugon sa sulod sang ceres bus bangud nagabayad ang mga ini sang insakto.
Suno sa iya, ginadumilian sang management ang mga amu sini bangud ang slogan sang Vallacar Transit amu ang paghatag sang masulhay, komportable, safe kag affordable nga byahe sa mga pasahero.
Suno diri, ang pagpatindog sa mga pasahero sa sulod sang bus ang posible pa nga matunaan sang mga aksidente.
Nagpanugyan si Marquez sa mga pasahero nga kun sila ang piliton nga magtindog, sarang ang mga ini nga makareport sa ila “text connect” apang kun indi sila makatext, sarang nila matandaan ang bus number nga ila ginsakyan kag ini ang ireport sa management.
