Nangin emosyonal ang pagkitaay sang utod kag duha ka mga kabataan ni Winniefred Natividad Dingding nga nagapuyo sa Barangay 8, Bacolod City kag madugay na nga ginapangita sang iya pamilya sa sulod sang 24 ka tuig.
Kaina, nagpadulong sa Barangay 8 ang utod ni Winniefred nga si Patricia kag mga kabataan sini nga sanday Rowena Dingding Sobretodo kag Michelle Dingding Sobretodo nagikan sa Cavite.
Suno kay Patricia, sang nagavideo call pa lamang ini kay Winniefred, wala na siya sang pagpangduha-duha nga ini ang iya utod kag sa karun nga iya nagid ini nakit-an sa personal, iya gid nakumpirmar nga ini ang ila madugay na nga ginapangita.
Suno diri, magalakat pa kuntani si Winniefred kaina kag nakasakay na ini sa pedicab apang maayo na lamang bangud ila ini naabtan.
Suno sa iya, gilayon nga nagkupo si Winniefred sa iya kag naghambal nga kahapon pa ini nagahulat sa ila.
Indi man ini agresibo kag nagasabat sang matarong kun ila ginapamangkot.
Suno naman kay Michelle, ila pagadal-un sa Manila ang ila iloy agud ipabulong.
Suno sa iya, wala man sang problema sa mga kabataan ni Winniefred sa Barangay 8 nga dal-un sa Manila ang ila iloy.
Suno diri, ang ila tiya nga si Patricia ang magabalik na sa Manila samtang sila ni Rowena ang magapabilin sa Bacolod tubtob nga mangin komportable na ang ila iloy kag mangin preparado sa pagbyahe.
Tuman naman ang pagpasalamat ni Rowena Dingding Sobretodo sa Bombo Radyo kag sa tanan nga nagbulig agud ila makit-an ang ila iloy.
Nangin kalmado naman si Winniefred kaina kag natigayon pa nga maistorya sang Bombo News Team sang gin-interview kaupod ang iya utod kag mga kabataan.
Suno kay Winniefred, nalipay gid ini kag nagapasalamat nga siya ang ginkadtuan sang iya mga kabataan.
Apisar nga indi sini madumduman ang pangalan sang iya mga kabataan, nakilal-an naman sini ang iya utod nga si Patricia kag gilayon nga nagkupo diri sang una niya ini nga nakita.
Sa karun wala pa ini nakahibalo kun luyag sini nga mag-upod sa iya mga kabataan sa Manila agud magpabulong.
