Ginpahayag sang presidente sang Philippine Guidance and Counseling Association – Negros Occidental Chapter kag counselor sa Hearticulate Psychological Center nga makabig nga “bullying” ang pagbody shame ukon ang pagcriticize sang physical nga aspeto sang isa ka tawo.
Sa interview sang Bombo Radyo kay Dr. Donalyn Lastima, panugyan sini sa tanan ang acronym nga H.I.Y.A ukon HIYA.
Suno kay Lastima, ang H ang nagapatimaan nga “Hold your judgment” kag likawan ang pagcriticize sa iban nga tawo.
Kun may luyag ka nga isaway sa isa ka persona, indi ini kinahanglan nga pakahuy-an.
Ang I, “Indulge in positive self-talk” ukon mangin positibo ang panulok sa kaugalingon.
Y ukon “You are unique just the way you are” kag ang A naman suno kay Dr. Lastima amu ang “Accept your flaws and celebrate life.”
Suno sa iya, makabig nga bullying ang pagbody shame bangud makaapekto ini sang self-esteem kag mental health sang isa ka persona ilabi na sang mga pamatan-on.
Panugyan sini sa mga naka-eksperyensya sang “body shaming” nga indi pag-idepende ang ila nga balor sa ekspektasyon sang iban nga tawo kag magfocus sa mga butang nga makahatag sang kalipay.
