Padayun pa ang pagtumod sang mga kapulisan sa banwa sang La Castellana sa suspetsado nga nagluthang-patay sa Barangay Kagawad sa Sitio Tayunong, Barangay Puso, La Castellana nga nasapwan na lamang sang Mayo 2.
Ang biktima ang ginkilala nga si Reynaldo Jacolbe, 49 anyos.
Sa interview sang Bombo Radyo Bacolod kay Police Major Sherwin Fernandez, officer in charge sa La Castellana Municipal Police Station, ginatinguhaan pa nila nga makakuha sang statement gikan sa mga pumuluyo sa lugar kalakip na ang mga may kaangtanan sa biktima.
Una nga ginpahayag ang posibilidad nga ini ang kahimuan sang makawala nga grupo, apang nagpagwa na sang statement ang Communist Party of the Philippines – New People’ Army (CPP-NPA) nga nagapanginwala nga sila ang may kahilabtanan sa krimen.
Ang lawas ni Jacolbe ang nasapwan sa kalasangan na nga bahin sang Barangay kag wala man sang nakatuad nga witness.
Isa sa karun sa ginatulok nga motibo ang may kaangtanan sa propedad bangod ang biktima ang may gina-aryenduhan nga duta.
Kasubong man ang posibilidad nga love triangle, bangod sa alegasyon nga ini ang may kerida kun sa diin sa adlaw ini ang nagapuyo upod sa iya asawa, apang kaupod ang kerida sa gab-i.
Sa pihak sini, pahayag ni Fernandez nga may-ara naman sila sang persons of interest nga ginalantaw, apang sila ang wala sang mabakod nga ebidensya.
Panawagan sini sa may ihibalo ukon sa mismo naghimo sang krimen nga magsungka na lamang kag ihatag ang nagakaigo nga hustisya sa biktima.
Pasalig naman sini sa magasugid nga ang kapulisan ang nakahanda nga maghatag sang seguridad.
Sa pihak nga bahin, nagpasalig naman sang bulig ang alkalde sa banwa sang La Castellana sa pagpalubong sa biktima.
Sa interview sang Bombo Radyo Bacolod kay Mayor Rhumyla Nicor-Mangilimutan, ginalantaw man sang kapulisan ang tanan nga mahimo anggulo sa krimen.
Nagpalab-ot naman ini sang pagpakig-unong sa nalisdan nga pamilya, kag ginpasalig sini nga magabulig ang banwa.
Suno diri ang Municipal Government ang magabulig sa haya kag pagpalubong sang Barangay official kalakip na ang pagpabalsamar, lungon kag pantyon.
Suno kay Mangilimutan, scholar man sini ang mga kabataan sang Barangay Kagawad.
Gin-abiso naman sini sa kapulisan nga magkoordinar sa militar bangod nagpatukod na ini sang detachment malapit sa lugar bangod sa sadto problema sang banwa sa insurhensya.
