Tuman ang kalipay sang coach kag athletes sang Ramonito Maravilla National High School sa Brgy Estefania, Bacolod City sa pagpatukod sang ila bag-o nga athletes dormitory.
Suno kay Coach Miggy Arca, madugay na sini nga ginpatindog ang balay para sa mga atleta apang sa karun ang plywood nga dingding ang nagkalakakas, kag nagkalaguba naman ang kahoy nga salog, bisan ang banyo sang mga atleta ang guba na.
Suno kay Arca, sang nagdaog sang gold medal si Mico Villaran sa Palarong Pambansa 2024, nagcourtesy call ang atleta kay Bacolod City Mayor Alfredo ‘Albee’ Benitez kag iya ginpakita ang lugar nga ginatiniran sang mga gold medalist.
Gilayon naman nga nagmando ang alkalde nga ikumpirmar ang land title para nga mapatukoran sang dormitory ang mga athletes.
Wala na napunggan pa ni Arca nga mangin emosyonal sa karun nga mahatagan na sila sang mas manami nga dormitory nga amo ang pinakauna nga athlete dormitory sa ciudad.
Samtang, dako man ang pagpasalamat sang mga atleta sa ihatag sa ila nga bag- o nga balay.// Suno sa Grade 10 student nga si Michael Grejaldo Jr, lima ka tuig na ini nga nagatinir sa ila nga hayob-hayob, amo nga ginakalipay sini nga mahatagan na sila sang mas manami nga balay nga ila matiniran kag sila ang makapahuway na sang insakto.
