Plano nga ipatuman sang national government ang QR Coded Persons with Disability (PWD) kag senior citizens ID kasubong man business permit nga ginpresentar ni Bacolod City Mayor Alfredo “Albee” Benitez sa Senado.
Gindayaw ni Senator Win Gatchalian, chairperson sang Committee on Ways and Means sa Senado ang presentasyon sang unique nga sistema.
Gin-eksplikar ni Benitez kun paano ginwelcome sang mga negosyante sa Bacolod City ang innovation kag ini ang nakapadula man sang nagduging nga pagpameke sang IDs kag dokumento.
Suno diri, kada tuig nagadangat sa P30 tubtob P50 billion ang balor sang mabenepisyo sa discount gikan sa PWD kag Senior Citizens ID, apang dako nga porsyento sini ang gin-avail sang mga fake ID holders.
Sa karun, ang Bacolod City pa lamang ang naga-implementar sang QR Coded PWD kag Senior Citizens ID.
Paathag sang alkalde nga mahapos lamang ang pagset-up sang system kun sa diin mastore ang tanan nga details sang holders.
Sa tion nga iscan ang QR Code, magwa sa mobile phone ang parehas nga kaundan sang impormasyon nga makita sa ID, gani may-ara sang basihan kun husto ang mga detalye.
Ang ciudad ang naga-angot man sa City Health agud maseguro nga legitimate ang medical certificate sang mga nagakuha sang ID kag ini ang masulod sa ila record.
Ang QR Code ang mascan man sa bisan nga diin nga bahin sang pungsod.
Gindala man sini ang pila sa mga IT personnel agud mas makapaathag.
Matapos makita nga maayo ang epekto sang system sa PWD IDs, gani ini ang gin-extend sa Senior Citizen kag Single parent IDs, kasubong man sa business permits.
Pinaagi sini, mavalidate sang business owners kun legitimate ang mga card holders bangod madamo sang nagapamintaha.
