Tatlo sa mga business establishments sa Bacolod City nga nagabaligya sang christmas decorations, ang natukiban nga nagabaligya sang mga christmas lights nga wala sang nagakaigo nga markings.
Madumduman nga una na nga ginpahanumdom sang Department of Trade and Industry (DTI) – Negros Occidental nga sa pagbakal sang electrical christmas decorations, dapat seguruhon nga may-ara sang Philippine Standard (PS) marking kag Import Commodity Clearance (ICC) logo.
Sa interview sang Bombo Radyo Bacolod DTI- Negros Occidental senior trade and industry development specialist Reginald Hudierez, sa pito ka mga commercial establishments nga ila natsekyar sang Miyerkules, tatlo diri ang nakita nga nagabaligya sang mga produkto nga wala sang PS kag ICC markings.
Ang mga ini ang gin-abisuhan nga ipull-out ang mga produkto sa display area bilang warning.
Suno kay Hudierez, sila ang magapadala man sang team nga liwat nga maga-inspect sa establishimento kag kun makita nga ginbalik sa display ang mga produkto ang mga ini ang may pangatubangon nga konsekwensya./
