Napasakaan na sang kaso ang lalaki nga nanaya kag nagpalupok sang armas-luthang sa tunga sang komosyon sa duta sa Hacienda San Antonio Dos, Barangay Dos Hermanas, Talisay City.
Madumduman nga naglapta sa social media ang video kun sa diin gintayaan ni Jose Aluntaga Jr, Alyas Jojo ukon Alyas Cesar Castro, 68 anyos, ang isa mga Comprehensive Agrarian Reform Program (CARP) Beneficiaries may kaangtanan sa gina-agawan nga duta nga ginaclaim naman nga ginapanag-iyahan sang negosyante nga si Paul Chang.
Sa interview sang Bombo Radyo Bacolod kay Police Lt. Col. Salvador Trono, hepe sang Talisay City Police Station, ginpasaka nila sa City Prosecutor ang kaso nga grave threat in relation to Republic Act 10591 ukon Comprehensive Firearms and Ammunition Regulation Act kag paglapas sa Comelec Gun Ban.
Apang paathag sini nga indi pa nila madakop si Aluntaga tubtob wala pa napanaog ang warrant of arrest.
Sa karun nagapabilin nga at large ang suspect, kag ginapatihan nga wala na sa Talisay City.
Apang pasalig ni Trono nga sila ang may mga pamaagi agud madakop ang suspect.
Samtang panawagan naman sang hepe sa mga naga-agaway sang duta nga ini ang ipaagi lamang sa diplomasya.
