Ginsuspend sang alkalde sang banwa sang Hinigaran, Negros Occidental ang trabaho sa gobyerno kag klase sa pampubliko nga eskwelahan, kahapon para sa commemoration sang EDSA People Power Revolution Anniversary.
Sa interview sang Bombo Radyo kay Hinigaran Mayor Jose Nadie Arceo, ginpermahan sini ang Executive Order No. 003 Series of 2025 nga wala sang trabaho sa government offices kag wala sang klase sa public schools.
Suno diri, dapat makilala ang EDSA People Power Revolution sang mga tawo nga isa ka importante nga hitabo sa history sang Pilipinas.
Dugang pa sini, dapat nga balikan ang mga kinabudlayan sang mga pumuluyo sadtong ginpatuman ang martial law.
Apang, gin-athag man sini nga wala sang pamulitika kag wala sang malisya sa likod sang iya deklarasyon.
Ang banwa sang Hinigaran ang naga-isahanon nga nagdeklarar sang kanselasyon sa trabaho kag klase kahapon sa pagdumdum sang EDSA People Power Revolution Anniversary.
