Masobra 700 ka mga illegally posted campaign materials ang napangsikop sang Commission on Election (Comelec) – Bacolod sa ginpatgayon nga Baklas Operation sang Miyerkules.
Sa interview sang Bombo Radyo Bacolod kay Bacolod City Election Officer Atty Revo Sorbito, sila ang nagpatigayon sang Operation Baklas sa Burgos Street padulong sa Lopues East kag Circumferential Road padulong sa Barangay Bata.
Aminado man ini nga bisan natapos na sila sa Barangay Mandalagan area, madamo gihapon sang makita nga illegal campaign materials.
Suno kay Sorbito, matapos ang Operation Baklas, kaangay nga ginabantayan lamang sila kag nagapanapik naman sang panibag-o nga campaign posters partikular na kun gab-i.
Paathag sini nga ila nga gina-inventory ang mga Senatorial candidate kag Partylist representatives nga may illegal campaign materials kag ginasumiter sa Comelec Central Office.
Sila ukon ang Central Office ang nagapadala naman sang mga notices sa mga violators nga dapat paluson ang mga illegal campaign materials sa sulod sang 72 oras agud indi mapasakaan sang election case kag masubject sa disqualification.
Mahimo ginakatingala man sang iban nga ginalabayan lamang sang Comelec ang iban nga illegally posted campaign materials, apang paathag ni Sorbito nga ini ang masami iya sang local aspirants.
Suno diri, sa Marso 28 pa magasugod ang local campaign period, kag amo palang makabig nga violation ang pagpanapik sang ila mga posters.
Ang campaign posters ang dapat 2 feet by 3 feet kag indi man pwede nga itapik tapik agud nga maglapad.
Aminado ini nga sulit-sulit na lamang ang ila pahanumdom sa kada campaign period, rasun kun ngaa determinado gid si Comelec chairman George Erwin Garcia sa pagfile sang caases batok sa violators
Nagalaom ini nga pinaagi sa tikang, ini ang magaserbe na nga leksyon sa iban ilabi na sa mga masunod nga kandidato sa eleksyon.
Pasalig man sini nga may proseso sa pagfile sang reklamo kag may patigayunon man nga imbestigasyon.
