Pormal na nga ginsuguran ang 2025 Western Visayas Regional Athletic Association (WVRAA) Meet kahapon alas-4:00 ang takna sa hapon, Marso 2, 2025.
Ginpatigayon ang opening ceremony ang patigayunon sa Binirayan Sports Complex sa San Jose, Antique.
Magapaindis-indis ang mga 6000 ka mga atleta nagikan sa Aklan, Antique, Capiz, Guimaras, Iloilo, kag Negros Occidental sa nagkalain-lain nga mga hampang.
Ang WVRAA ang magalawig tubtob Marso 8.
Subong nga tuig, ang tema sang nasambit nga aktibidad amo ang “United as Champions in Gearing Up the Journey Towards Excellence.”
Sa interview sang Bombo Radyo Bacolod kay Negros Occidental Sports Coordinator Romeo Sison, nagtambong sa opening sang WVRAA sa probinsya sang Antique si Negros Occidental Governor Eugenio Jose “Bong Lacson; La Castellana Mayor Rhumyla Nicor Mangilimutan; Silay City Mayor Joedith Gallego kag Kabankalan City Mayor Benjie Miranda.
Nagtambong man sa opening sang WVRAA sanday Govenor Joen Miraflores sang Aklan kag Frenedil Castro sang Capiz.
Suno kay Sison, wala sang dinapit nga bisita nga mga politiko nagikan sa national magluwas nalang sa mga local officials nga may bahin sa ginpatigayon nga programa.
Suno diri, isa si Department of Education Secretary Sonny Angara nga dinapit nga bisita santo man sa nakasulat sa program of activities.
Ang Negros Occidental kag Bacolod City athletes ang upod sa ila belitting area sa Muscoso Rios National High School sa banwa sang Hamtic, Antique.
Nagalaom si Sison nga madamo nga medalya ang makuha sang delegates sang Negros Occidental.
Ini agud nga mangin makasaysayan bangud ini na ang ulihi nga regional meet sa Western Visayas nga makaupod ang probinsya.
Sa madason nga tuig 2026, ang Negros Occidental ang magahampang na sa Negros Island Region Association (NIRA) Meet.
Maayo man ang sitwasyon sang mga atleta bisan nga mainit ang panahon kag may mga van man nga nagadul ong sa mga atleta sa lugar sang sports event.
