Nagbukas na ang bag-o kag permanente nga opisina sang Negros Electric and Power Corporation (NEPC) sa The Row, Lacson Street, Barangay Bata, Bacolod City.
Sa interview sang Bombo Radyo Bacolod kay Negros Power spokesperson Jonathan Cabrera, ang permanente nga opisina ang nahamtang sa commercial complex nga katupad lamang sang Citadines hotel.
Pahanumdom sini nga ginsarado na nila ang opisina sang Negros Power sa Robinsons East.
Pasalig ni Cabrera nga kompleto na ang pasilidad sa permanente nga opisina kaangay sang cashier, human resource, administrative, technicians, corporate offices kag iban pa kag sila ang may-ara man sang 24/7 helpline.
May natalana gihapon nga special lanes para sa senior citizens kag persons with disabilities (PWD).
Ang opisina ang nagabatun sang tanan nga transakyon kaangay sang New Connection Applications, Document Submissions, Bills Payments, bill inquiries, kag iban pa.
Mabugnaw man sa nasambitan nga pasilidad kag yara gihapon ang ila libre nga kape kag tinapay.
May-ara man sang malapad nga parking space sa idalom, mas malapad sangsa parking space sa Robinsons East.
Dugang pa ni Cabrera nga mas safe ang salakyan sa lugar, bangod may-ara sang security guard nga nagabantay.
Apang panugyan ni Cabrera nga mas maayo nga kun magbayad sang bill kun indi lang man past due, sa mga 3rd party collecting agents na lamang magbayad.
Ini bangod nagakatalupangdan sini nga may mga adlaw nga naga-awas na sa gwa ang mga kliyente, nga kalabanan magabayad lamang sang electric bill.
Pahanumdom sini nga mahimo ang pagbayad online ukon sa iban pa nga collecting agents, kag pinaagi sini indi na kinahanglan pa nga magbyahe ukon magpila sa opisina sang Negros Power.
Sila ang bukas Lunes tubtob Sabado halin alas-8:00 sang aga tubtob alas-5:00 sang hapon.
