Nagpanawagan ang Punong Barangay sa Brgy Guimbalaon, Silay City nga ipaagi sa nagakaigo nga proseso ang isyu sa duta sa Hacienda Bias, kag indi na pagpadangaton pa sa sakitanay.
Ini kasunod sang nagluntad nga komosyon sa tunga sang mga Agrarian Reform Beneficiaries kag Blue Guards kaina sang aga kun sa diin lima ka ARBs kag lima ka Blue Guards ang nasamaran.
Sa interview sang Bombo Radyo Bacolod kay Punong Barangay Samuel Larida, ini ang ikaduha na nga komosyon.
Suno diri, ginhatag sang Department of Agrarian Reform Central Office kay Gretchen Vargas ang duta, apang nagpadala naman sang motion for reconsideration ang mga ARBs.
Panawagan sang mga ARBs, nga indi lang anay tandugon ang duta samtang wala pa sang desisyon apang kaina, nagpadala sang duha ka traktora si Vargas agud ipa-arado ang apat ka ektarya nga duta.
Suno diri, sa una nga komosyon, naghingyo si Police Lt Col. Mark Anthony Darroca, hepe sang Silay City Police Station sa tag-iya nga hatagan anay sang isa ka bulan nga plaso bangod wala pa ang desisyon sa appeal.
Apang naglapaw na ang isa ka bulan, wala gihapon ang nakapagwa sang desisyon ang DAR.
Pangabay na lamang sini nga ipaagi sa legal kag sa proseso kag indi na magdangat sa sakitanay.
Apang sa mga napilasan, ang mga ini ang may-ara gid sang kinamatarong sa pagfile sang kaso.
Ginapakamaayo naman ni Darroca nga nagkalma na ang mga pumuluyo kag blue guard sang ma-estorya sang mga kapulisan.
Paathag sini nga may finality na sa desisyon sang DAR nga nagahatag sang duta kay Vargas.
Panindugan naman sang mga ARBs nga wala sila makahibalo nga ginkanselar na ang ila mga dokumento, gani sila ang nagfile sang motion for reconsideration agud mabalik sa ila ang pagpanag-iya sang duta.
Sa pag-usisa sini, tatlo na ka tuig ang konflikto sa propidad.
Suno kay Darroca, sa mga ARBs nga nakigbahin sa komosyon, madamo sa mga ini ang babayi.
Gin-abiso naman sini ang pagfile sang reklamo, ilabi na nga may mga nagkalasamaran.
Nakita man sini ang video nga may ara sang mga nagahinampakanay sang kahoy.
Suno diri, kun magpasaka sang kaso, mahimo diri nga mafile ang physical injury.
Pasalig sang hepe nga tun-an pa nila ang video kag kun may makita nga ebidensya ipanugyan nila ang pagpasaka sang kaso.
