“Benepisyo sa ila, perwisyo sa amon,” ini ang paglaragway sang mga pumuluyo sang Hacienda Pacita sa Brgy Don Jorge Araneta, Bago City sa ginapatigayon nga quarry operation sa ila nga lugar.
Nagdangop sa Ipa-Bombo Ta segment sang Bombo Radyo Bacolod si Antonio Patricio, agud ireklamo ang proyekto nga nagatuga na sang pagka-ab ab sang duta nga ginapanag-iyahan sang pila ka Agrarian Reform Beneficiaries, kag nagguba sa ila alagyan.
Dala ni Patricio ang kopya sang petition letter nga ginpadala nila sa Barangay kag pirmado sang 71 ka pumuluyo sa lugar.
Ang quarry operator amo si Fidel Hernandes, samtang ini ang ginadumalahan ni Darlene, ukon mas kilala bilang Madam, nga asawa sang isa ka Brgy Kagawad.
Panindugan ni Patricio nga hugot ang ila pagpamatok sa quarry operations bangod ini ang nagahalit na sa ila, kag amat amat nga nagaka-ab ab ang Maragandang River.
Nagadangat na sa anom ka metros sang propedad sang isa ka ARB ang nadula bangod sa pagkatiphag sang duta.Ginpangita man nila sa backhoe operator ang permit sa proyekto apang sila ang ginatanyagan lang nga mag-estorya kay madam.
Sang ginpamangkot nila sa Brgy Kagawad, sabat lamang sa ila nga ang proyekto ang aprubado na sang Provincial Environment Management Office (PEMO).
Apang suno kay Patricio, wala nakapatigayon sang Public Consultation sa Prk Riverside kun sa diin ginapatigayon ang quarry operation.
Naggwa nga may ginpatigayon nga public consultation sang 2023, apang sa kaingod nga Prk Bungyod.
May impormasyon man nga ginpatawag ang mga pumuluyo bangod sa tanyag nga may libre nga ipanghatag nga bulong, apang ang ginpapirmahan para sa attendance, ang gina-alegar nga amo na ang public consultation.
Ang duha ka ARBs nga nagareklamo ang ginpasummon pa ni Madame sa Brgy, samtang ang mga opisyales ang nagadampig man sa pihak nga kampo.Sa kaangot nga balita… Luwas sa pag-usmod sang duta nga nagkaon na sang masobra anom ka metros sang propedad sang Agrarian Reform Beneficiaries sa Hacienda Pacita sa Brgy Don Jorge Araneta, Bago City, nadula naman ang ila dalan bangod sa quarry operation.
Pahayag sini nga naguba sadto ang dalan nga ginalabayan sang kadam-an sang maglaslas ang Bagyo Tino.
Ini ang gintinguhaan nga makay-o sa budget nga P46,000.
Apang ini ang nauyang lamang matapos amat amat gihapon nga gina-ab ab sang tubig.
Gani sa karun imbes nga malapit lamang ang lalakton sang mga kabataan padulong sa eskwelahan, sila ang nagalibot pa sakay sa tricycle, sa byahe nga magalawig sang isa ka oras.
Nagpamahog pa si Madam nga magapatawag sang tanod kag pulis sa mga nagapamatok nga pumuluyo.Paandam sini nga kun balabagan ang quarry operations, ang mga pumuluyo ang pabayaron nila sa P3,000 nga arkila kada oras sa kada backhoe.
Suno kay Patricio, may duha ka backhoe nga naga-operate sa area, kag masako naman ang balik-balik sang mga nagahakot sang aggregates.
Pahayag sini nga wala gid sang napakita sa ila nga permit kag kopya sang nagpirma sa public consultation.
