Ginkumpirmar sang public information officer sang Department of Education Regional Office 6 nga itransfer si DepEd Region 6 Director Dr. Ramir Uytico bilang Regional Director sang DepEd Negros Island Region.
Sa interview sang Bombo Radyo Bacolod kay Hernani Escullar Jr., nabatun nila ang memo kahapon sang hapon tuhoy sa appointment ni Uytico sa DepEd NIR.
Apang samtang wala pa maka-abot ang magabulos diri nga si Dr. Cristito Eco, ang Assistant Regional Director sa DepEd National Capital Region, indi pa makasaylo si Uytico agud wala sang matabo nga vacuum of leadership.
Bangod sini, si DepEd Negros Occidental Schools Division Superintendent Anthony Liobet anay ang magapungko nga Officer in Charge Director sa DepEd NIR.
Suno kay Escullar, apat ka tuig kag duha ka bulan man nga nagserbe nga Regional Director si Uytico sa DepEd Region 6 apisar nga ang standard operating procedure ang kutob lamang sa tatlo ka tuig.
Apisar sa pagtukod sang DepEd NIR, pasalig ni Escullar nga sa mga upcoming activities kaangay sang Palarong Pambansa sa Mayo, ang Negros Occidental kag Bacolod City ang kaupod gihapon sa Region 6.
Dako naman ang legasiya nga ginbilin ni Uytico sa DepEd Region 6 partikular na ang pagtukod sang 21 ka mga farm schools sa Negros Occidental.
Sang damlag lamang, isa sa ginbisitahan ni Education Secretary Sonny Angara ang Ramon Torres Malingin Farm School sa Bago City.
Nagapati si Escullar, nga kaangay sa ginhimo sini sa Region 6, magatukod pa sang dugang nga farm schools si Uytico partikular na sa Negros Oriental kag Siquijor.
Dako man nga bulig ang pagtukod sini sang School Heads Academy, nga nakapagraduate sang madamo na nga mga masters degree agud mangin equip kag maqualify bilang School Heads.
Suno kay Escullar, si Uytico ang madamo pa sang ideya nga ma-implementar sa Negros Island Region agud mapasaka ang kalidad sang edukasyon.
