Ginpanindugan sang pila ka mga pumuluyo sang Purok Tonggoy, Barangay Mandalagan, Bacolod City, ang ginapatigayon nga construction sa pagtukod sang cell site sa ila nga area.
Sa ‘Ipa Bombo Ta’ segment sang Bombo Radyo Bacolod, gindangop ni Alyas Teres, ang ila complaint, bangod suno diri, mayorya sa mga residente ang nagapamatok sa proyekto.
Paathag sang complainant nga ginakahangawa nila ang radiation nga matuga sang cellsite.
Suno kay Teres, Disyembre 2024 sang nakalab-ot sa ila ang impormasyon nga may itukod nga cellsite sa isa ka pribado nga lote.
Apisar nga pribado, panindugan sang mga ini nga malapit sa pamalay ang duta.
Nagpatawag sila sang meeting sang makatatlo na ka beses, kag may tion nga ginpapirma ang mga pumuluyo sa ginpakilala nila nga attendance sheet.
Suno kay Teres, sa tatlo ka meeting maathag nga 90 porsyento sang 20-30 ka pamilya sa Prk Tinggoy ang nagapamatok, kag ang 10 porsyento nga nagapabor ang mga himata lamang sang tag-iya sang duta.
Apang sa baylo, nakibot na lamang sila nga nagsugod na kutkot sang duta ang contractor, nga suno diri, may pahanugot ni Punong Barangay Paul Anieve.
Suno kay Teres, ang ginpapirmahan nga attendance sheet sa meeting, ang ginapakilala sang mga ini nga listahan sang mga sugot sa proyekto.
Magluwas sa ila, dikit man sa pader sang Camella Subdivision ang propedad, kag wala man sang ihibalo ang mga pumuluyo sa subdivision tuhoy sa proyekto.
Kun sumahon suno kay Teres, nagadangat sa 230 ka mga pamalay ang apektado sa pagtukod sang cellsite.
Suno diri, pila sa mga nagapamatok nga pumuluyo ang nagbutang na sang baral, agud indi makasulod ang mga construction equipment.
Ginakahangawa sini nga kun ipilit ang proyekto, mahimo magluntad ang kinagamo.
Dugang pa sini nga ang tag-iya sang pribado nga duta ang indi apektado, bangod malayo ang balay sini sa propedad.
