Gin-athag sang alkalde sang La Carlota City nga wala sini ginkanselar ang selebrasyon sang Pasalamat Festival 2025 kundi temporaryo lamang nga ginsuspend.
Sa interview sang Bombo Radyo Bacolod kay La Carlota City Mayor Rex Jalando-on, unpredictable ang sitwasyon sang Bulkan kag wala man sang makahambal kun san-o liwat mag-alburoto ang Bulkan Kanlaon kag kun bala magasaka pa ini sa Alert Level 4.
Suno kay Jalando-on, nagapangatubang ang ciudad sang problema sa ashfall kag ang duha ka Barangay sa ciudad kalakip ang Barangay San Miguel, ang may yara sang problema sa water supply gani ginarasyonan na lamang sang ciudad agud nga may gamiton ang mga residente.
Ini ang kabahin sa mga rason kun ngaa ginpaiway anay ang selebrasyon sang nasambit nga kapiestahan.
Dugang pa sang alkalde nga iselebrar na lamang sang mga ini ang Pasalamat Festival sa tion nga magkanay na ang sitwasyon sang Bulkan Kanlaon kag kun magbalik na sa Alert Level 2 ang status.
Indi man manami suno sa alkalde kun iselebrar nila sa karun ang Pasalamat Festival bangud ang iban ang nagasinadya apang pila sa mga residente ang nagaproblema bangud nga wala sang supply sang tubig.
Nagpanawagan ang alkalde sang paghangop sa pagpaiway sang Pasalamat Festival 2025 bangud indi pa ini ang husto nga tion agud nga magsinadya.
