Liwat na nga ginbuksan ang Pulupandan Port sa banwa sang Pulupandan, Negros Occidental.
Sa opening sang full operations sang Martes, ginkumpirmar ni Philippines Port Authority – Negros Occidental port manager Rodel Lagmay, full package na ang ila operasyon apang sa karun fastcraft vessel pa lamang ang magabyahe kag wala pa sang Roll-on Roll-off (RoRo) vessels.
Wala man sila sang limitations bisan sa mga foreign vessels magluwas lamang sa tuman ka dalagko nga barko.
Ang magamanage sang port operations amo ang Negros Coastal Terminal Incorporated nga may kontrata nga 15 ka tuig, apang mga ini ang naka-umpisa na antes paman ang COVID-19 pandemic.
Ini ang liwat na nga pagbukas sang pantalan makaligad sang tatlo ka tuig nga pagsarado matapos makompleto ang tanan nga requirements.
Sa pihak nga bahin, positibo naman ang bise gobernador sa economic progress nga madala sang pagbukas sang Pulupandan port indi lamang sa banwa sang Pulupandan kundi sa bilog nga Negros Occidental.
Sa interview kay Negros Occidental Vice Governor Jeffrey Ferrer, ang pagbukas sang puerto ang makahatag sang dugang nga revenue para sa Municipal Government.
Ini ang dako nga bentaha para sa mga taga-Pulupandan bangod ang pagbukas sang port operations ang katumbas man sang magabukas nga job opportunities kasubong man magasanyog ang negosyo sa palibot.
Gincongratulate man sini si Pulupandan Mayor Miguel Peña sa liwat nga pagbukas sang Pulupandan Port.
