Gin-athag sang director sang Commission on Elections – Negros Island Region nga sila ang nakadepende sa evacuation plan sang local disaster office nga apektado sang pag-alburuto sang Bulkan Kanlaon sa pagpatigayon sang eleksyon.
Sa interview sang Bombo Radyo Bacolod kay COMELEC – Negros Island Region Director Atty Lionel Marco Castillano, sa ila polisa, kun diin nahamtang ang mga botante, didto man magapatigayon sang pagboto.
Pathag sini nga luyag sang COMELEC nga convenient ang voting process kag indi nila luyag nga may matabo pa nga hakutay.
Ini man ang rasun kun ngaa may mall voting sa Dumaguete City samtang internet voting naman sa mga overseas voters.
Pasalig ni Castillano nga may contingency plan ang Comelec sa mga apektado sang aktibidad sang Bulkan kanlaon agud nga indi mabudlayan ang mga botante.
Paathag sini nga bisan may problema sa Bulkan Kanlaon, trabaho sang Comelec nga maprotektahan ang boto sang mga evacuees.
Sa karun nga yara pa gihapon sa Alert Level 3 ang status sang Bulkan, sarang pa nga mapatigayon ang pagboto sa tagsa ka evacuation centers.
Sa tion naman nga magsaka sa Alert Level 4 ang status sang Bulkan Kanlaon, may na-identify naman nga duha ka Barangay sa banwa sang La Castellana nga gwa na sa 10km extended danger zone nga sarang mapatigayonan sang piniliay.
