Nagdangat sa kapin 17 ka mga indibidwal ang nagpasaka sang reklamo batok sa Indian national nga driver sang pula nga Toyota Innova nga nag-arado sa mga nagprusisyon sang Biyernes Santo sa Barangay Alangilan Bacolod City.
Ang driver ang ginkilala kay Jagpret Shingh, 37 anyos kag residente sang B133, Lot.89, Buena Park Subd., Brgy. Villamonte, Bacolod City.
Sa interview sang Bombo Radyo Bacolod kay Atty. Jose Luis Bunagan Guatera, Legal Counsel sang Indian national, pasado alas 9:00 na ang takna sang gab-i sila nakatapos sa Fiscals Office.
Suno kay Guatera, ang reklamo nga ginpasaka sang mga complainants batok sa kliyente sini ang ginlakipan sang qualified reckless imprudence resulting to multiple homicide, multiple physical injuries nga ginalakipan sang slight, less serious kag serious physical injuries) kag damage to property.
Suno diri mahimo man nga magapiyansa ang kliyente sini bangud lunsay bailable ang reklamo nga ginpasaka batok diri.
Samtang, una na nga ginpahayag sang abugado nagpangayo ang Indian national sang pasaylo sa pamilya sang mga biktima matapos gin-arado sang ginmaneho sini nga salakyan ang mga nagaprusisyon kun sa diin tatlo ang napatay.
