Nagpahamtang sa mga water tankers sa 10 ka Barangay nga natumod nga may maninit ukon wala nagid sang nagakabatun nga supply sang tubig sa Bacolod City.
Sa pahayag ni Bacolod City Mayor Alfredo “Albee” Benitez, ang mga Barangay Officials ang ginmeeting na upod sa Bacolod City Water District (BACIWA) – Prime Water kag City Disaster Risk Reduction and Management Office (CDRRMO).
Gintalakay kun ano ang mga tikang nga dapat himuon karun nga nagatagiti ang init kag naganubo ang supply sang tubig.
Ang BACIWA Prime Water kag CDRRMO ang naghamtang sang mga water tanks nga may 20,000 liters capacity, kag ini ang adlaw adlaw nga supplyan sang tubig.
Ang tubig ang indi naman mainom ukon indi potable water, apang sarang magamit sa paghugas sang pinggan, hugas sang mga lulutuon ukon sa pagpaligo.
Indi naman bilog nga mga Barangay ang wala ukon mahina ang tubig kundi may-ara lamang sang mga Purok nga apektado.
Suno kay Benitez, sa ila water system una gid anay nga ginasecure amo ang water supply, kag wala na danay ginapaligban ang paghamtang sang dugang nga water pipes ukon pag-ilis sang mas dalagko.
Ini bangod luyag niya nga masageruo nga may nagakaigo nga supply sang tubig bisan sa summer season ukon may el niño.
Kalakip sa plano ang pagconvert sang existing deepwells ukon underground water agud mangin reserve water supply sa ciudad.
Pahayag ni Benitez, nga ini ang dapat sadto pa ginhimo bangod ang water table sa mga surface water kaangay sa suba ang kun kis-a nagapanaog, nga magaserbe nga kaangay sang backup generator.
Suno diri, ang Bacolod City ang nagagamit sang 53 tubtob 55 million liters per day (mld) nga tubig, nga dako nga butang nga magamit sa karun nga sitwasyon.
Ginhalimbawa sini ang karun nga siwasyon kun sa diin ang 84 (mld) ang nagpanaog sa 77 mld.
Ang 7 mld nga nadula suno kay Benitez ang makaapekto na sa ginatos nga pamalay.
