Nagpasalig sang all out support ang tiglikom sang Department of Transportation sa mga lihok sang Bacolod City Government angot sa Public Utility Vehicle Modernization Program, kag ang ciudad ang plano nga himuon role model para sa implementasyon sa bilog nga Pilipinas.
Si Transportation Secretary Vivencio “Vince” Dizon, ang nagpadulong sa Bacolod City Government Center upod ang mga Regional Directors sang Land Transportation Office (LTO) kag Land Transportation Franchising and Regulatory Board (LTFRB).
Matapos ang ila nga meeting, ginpahayag ni Dizon nga tumalagsahon makakita sang local government unit nga proactive kag progressive nga kaangay sa Bacolod.
Suno diri, sila ang nagapatigayon sang comprehensive review kag nagalibot sa nagkalainlain nga probinsya nga naga-implementar sang PUVMP bangod madamo sila sang nakita nga problema.
Kalabanan sa mga drivers kag operators ang nabudlayan sa transition kag may kabudlayan sa pinansyal.
Gindayaw man sang Transportation Secretary si Bacolod City Mayor Alfredo “Albee” Benitez kag Congressman Greg Gasataya sa mga efforts agud mabuligan ang transportation sector.
Ginqoute man sini ang ginhambal ni Mayor Albee nga mangin epektibo lamang ang programa kun makita ang economic benefits sa mga stakeholders ukon sa mga drivers kag operators.
Apisar sa mga dalagkuan nga problema nga ginapangatubang sang ciudad angot sa programa, ginapakamaayo sini nga vocal ang transport sector sa pagpa-utwas sang ila problema samtang klaro naman ang vision sang lokal nga gobyerno.
Nahibaluan nga isa sa mga ginpresentar ni Mayor Albee sa meeting ang tatlo ka Local Public Transport Route Plan (LPTRP) para sa green route nga agyan sang mga electric jeepneys.
Pasalig ni Dizon ang commitment sang DOTr sa paghatag sang nagakaigo nga bulig, kag ang implementasyon sang PUVMP sa Bacolod City ang ginalantaw sini nga himuon nga modelo sa nationwide implementation.
