Nagalaom ang unconsolidated traditional jeepney drivers kag operators sa Bacolod City nga sa masunod nga semana makapagwa na sang memorandum order nga nagapahanugot sa legal nila nga pagbyahe.
Madumduman nga nagbisita kahapon si Department of Transportation Secretary Vivencio “Vince” Dizon sa Bacolod City upod sa mga regional director sang Land Transportation Office (LTO) kag Land Transportation Franchising and Regulatory Board (LTFRB) kag nagsapol upod kanday Bacolod City Mayor Alfredo “Albee” Benitez.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD) pabor gid sa ila si Dizon kun sa diin sa atubang sang ginatos nga mga drivers kag operators, ginpasalig sini nga ireview ang liwat nga paghatag sang provisional authority.
Apisar nga wala sang ginbuy-an nga petsa kahapon, sa ila nga meeting sa DOTr central office ang Marso 21, ginpasalig ni Dizon nga sila ang pahanugotan nga makabyahe sang legal antes paman ang Abril 30 ukon sa anibersaryo sang pagtakop sang consolidation process.
Nagapati si Catedral nga may approval gikan kay President Ferdinand “Bongbong” Marcos Jr. ang desisyon.
Ginalantaw sini nga ginbuslan ni Dizon si former DOTr secretary Jaime Bautista bangod nakita ni President Bongbong Marcos nga ini ang mas nagakadapat.
Isa ka pamatuod amo ang una nga pagpalapit ni Dizon sa ila sa baylo nga magrekta sa mga dalagkuan nga kapitalista.
Samtang ginatun-an pa ang implementasyon sang PUVMP, nagapati si Catedral nga dapat hatagan nga makabyahe sang ligwa ang parehas nga consolidated kag unconsolidated jeepneys.
Paathag man sini nga sila ang indi batok sa modernization, sa baylo sila ang nagapamatok lamang sa indi husto nga guidelines.
Panindugan ni Catedral nga indi masarangan ang presyo sang modernized jeep nga P2.4 million, kag willing man ang pila ka local car manufacturers sa pagrennovate sang salakyan agud makapasar sa euro 4 standard.
Pasalig ni Catedral nga kun mabalik na ang ila pangkisa, indi nman ang mga ini makita nga nagarally sa dalan.
