Naghatag sang paathag ang City Prosecutor sa Bacolod City sa rasun kun ngaa P60,000 lamang ang ginrekomendar nga bail bond sa Indian National nga nag-arado sang mga nagaprusisyon sa Brgy Alangilan kag nakapatay sa tatlo.
Madumduman nga dead on the spot si Jonelo Solan Sr. driver sang tricycle nga upod sa prusisyon matapos ginbungguan sang Toyota Innova.
Dead on arrival naman ang pasahero nga si Gilven Tabique kag si Daynah Plohinog ang napatay kasunod nga adlaw sa ospital.
Samtang madamo naman sang nasamaran.
Ang driver sang salakyan amo si Jagpret Singh, 37 anyos, nga ginpasakaan sang kaso nga reckless imprudence resulting to multiple homicide, multiple physical injuries, kag damage to property apang ini ang nakapyansa sang P60,000.
Sa press conference ni City Prosecutor Atty Ma Theresa Ditching, gin-athag sini nga sila ang may ginasunod nga bail bond guide
Diri nakabutang nga P10,000 ang penalties sa reckless imprudence regardless kun pila ang casaulties ukon injuries bangod ini ang kabahin sang correctional ukon afflictive category.
Paathag ni Ditching nga sila ang wala sang mahimo bangod amo ang nakapagkit sa Article 365 sang Revised Penal Code.
Sa idalom sang layi, may maximum sentence nga tatlo ka tuig sa nasambitan nga kaso, kag ang maximum years of sentence ang imultiply sa P10,000 agud makuha ang recommended bail.
Na-aggravate naman ang recommended bail kag ginpasaka sa P60,000 bangod sa pagtuyo pa sang Indiano nga magpalagyo matapos makomiter ang krimen.
Ini ang paathag sang City Prosecutor matapos nga sila ang gin-ulan sang kritisismo bangod P60,000 lamang ang bail apisar sang tatlo ka kabuhi nga nadula.
