Gindul-ong na ang mga Automated Counting Machines nga gamiton sa May 12 midterm elections sa mga banwa kag ciudad sa probinsya sang Negros Oriental kahapon, Abril 28.
Sa interview sang Bombo Radyo Bacolod kay Commission on Elections – Negros Island Region Director Lionel Marco Castillano, nagsugod man kahapon ang deployment sang mga ACMs sa mga LGUs sa Negros Occidental kag magalawig ini tubtob subong nga adlaw, Abril 29 kag magasunod naman ang probinsya sang Siquijor.
Ginkumpirmar man ni Castillano ang pagsugod sang Local Absentee Voting humalin Abril 28 kag magatapos sa adlaw sang Miyerkules, Abril 30 subong nga tuig para sa mga empleyado sang gobyerno kalakip na diri ang mga personnel sang Armed Forces of the Philippines, Philippine National Police, Philippine Coast Guard kag iban pa nga mga government offices kag mga katapo sang media.
Suno diri, pati ang mga personnel sang Commission on Elections ang qualified man sa absentee voting.
Sa absentee voting ang mga ginaboto diri ang mga national candidates ukon 12 ka mga senador kag isa ka partylist.
Ang pagboto ang magabukas alas 8:00 sang aga kag magatapos alas 5:00 sang hapon.
