Luyag sang anay alkalde kag Bacolod congressional candidate nga patigayunon ang manual counting kag tallying sang mga boto sa maabot nga May 12 midterm elections sa ciudad sang Bacolod.
Sa interview sang Bombo Radyo Bacolod kay Former Mayor kag Bacolod congressional candidate Evelio “Bing” Leonardia, nagpadala sila sang sulat sa central office sang Commission on Elections sa Manila nga nagapangabay nga sa ciudad sang Bacolod patigayunon ang manual counting kag manual tallying.
Ini bangud sa gina-alegar kamala-malahan sa midnight transaction kag madasig nga pag-award ni Bacolod City Mayor Alfredo Abelardo Benitez sa P2.1 billion Public-Private Partnership (PPP) nga kontrata sa Highdata Infra Corporation, nga ginapanag-iyahan sang SMS Global Technologies Inc.
Ginkaalarma man sang mga ini nga ang SMS ang may contrata sa COMELEC nga nagprovide sang machine nga gingamit sa OFW voting nga madamo ang nagreklamo.
Suno sa anay alkalde bangud nga may access sa COMELEC indi malayo nga may kamala-malahan nga matabo.
Ginahangkat man sini ang kampo ni Bacolod City Mayor Alfredo “Albee” Benitez nga updan ang iya pangabay kun wala sila sang ginatago.
Suno sa anay alkalde, siya ang naghimo sang tikang bangud nabatyagan sini ang pagpalangga sang mga pumuluyo kag nakita nga madamo ang magapili sa iya sa maabot nga piniliay.
