Ginakasubo sang Secretary General sang Alliance of Concerned Teachers (ACT) Bacolod City – Negros Occidental chapter ang report tuhoy sa 18 million nga mga High School graduates nga makonsiderar “functional illiterate.”
Sa interview sang Bombo Radyo Bacolod kay Grace Abellar, ginatinguhaan nila nga mga manunudlo nga matudluan ang mga kabataan sang critical kag analytical thinking, apang madamo sang factor nga nagaapekto sa development sang mga kabataan.
Kalakip sa mga factors ang pamilya, eskwelahan kag gadgets.
Suno kay Abellar, indi dapat ibasol tanan sa mga manunudlo ang pagnubo sang comprehension sang mga kabataan bangod dako man ang papel sang ginikanan sa pagtuon sang ila mga anak.
Paathag sini nga ginsumpaan nila ang pagtudlo sang pagbasa, pagsulat kag pag-isip sa mga kabataan, apang sa karun, sila pa ang nagaprovide sang mga kakulangan sang Department of Education.
Panindugan sini nga kulang katama ang classrooms, indi ventilated ang mga buluthuan, kag kulang man sang mga text books.
Imbes nga sila ang gilayon nga makatudlo, ang mga manunudlo ang magapangita pa sang paagi agud makahatag sang learning materials.
Suno kay Abellar, magluwas nga multiple choice ang exam, ini ang shaded pa nga rasun kun ngaa iban sa mga estudyante ang wala na nagabasa kag basta na lamang nga nagashade nga nagaresulta sang manubo nga exam result.
Kun mafailure ang kabataan ukon ma-idrop ang manunudlo, sila ang gina-ulan man sang madamo nga pamangkot nga rasun kun ngaa ginapapasar na lamang sang iban bisan nga indi pa kwalipikado.
Pahanumdom sini nga nagadangat sa 40 ang estudyante nga ginacater sang isa ka manunudlo, gani mabudlay nga mapaalam ang tanan.
Kun may mafailure ukon madrop sa klase, maganubo man ang ratings sang teacher nga maga-iban sa ila benepisyo.
Samtang dako man ang epekto sang gadgets sa pagtuod sang kabataan bangod imbes nga mahanas ang ila comprehension, sila ang nagasalig na lamang sa videos.
Paathag ni Abellar nga ginarekomendar sang DepEd ang paggamit sang modern technologies agud makabulig sa pagtuon, apang sa karun madamo sang indi makahangop kun magbasa apang madasig kun pasauton sa tiktok.
Dugang pa sini nga may iban nga estudyante nga nagasabat sa mga quizes paagi sa Chat GPT.
Panawagan ni Abellar nga ini ang dapat magserbe nga challenge sa gobyerno, nga solusyonan ang nagalala nga problema.
