Nagpatigayon sang grand rally ang Team El Cid sa Bacolod City Public Plaza duha ka adlaw antes magtakop ang campaign period para sa 2025 midterm elections.
Ang nasambit nga aktibidad ang ginpangunahan ni Mayoralty Candidate Vice Mayor El Cid Familiaran kaupod nanday Congressional candidate former Bacolod City Mayor Evelio “Bing” Leonardia kag Vice Mayoralty candidate Councilor Atty. Renecito Novero.
Kaupod sa grand rally ang mga nagapapili bilang konsehal nga sanday Former Councilor Atty. Archie Baribar, Atty Ana Marie Palermo, Former Councilor Wilson Gamboa Jr., Incumbent Punong Barangay Lindy De Leon, Bebeng Noble, Beboy Yap, Bebe Yulo, KNETCO President Lilian Sembrano, Pepito Pico, Rico Villafuerte, Christian Weber kag Ken Paulo Gilo.
Antes ang grand rally nagtambong ang Team El Cid sa ginpatigayon nga misa sa Bacolod San Sebastian Cathedral.
Naghatag sang mga mensahe ang mga kandidato kag nagpanawagan sang vote straight.
Sa mensahe ni Atty Renecito Novero, ginpasalamatan sini ang tanan nga nag-upod sa ila bisan nga nagutom kag nakapoy kag ini ang ginakabig niya nga miracle.
Suno kay Novero, nagapati ini nga may milagro nga matabo sa adlaw sang piniliay bangud bisan nga hatagan sang kwarta ang mga botante sundon sang mga ini ang ila nga mga konsensya sa pagpili sang mga kandidato nga makahimo sang matuod nga pagbag-o sa ciudad sang Bacolod.
Sa mensahe naman ni Leonardia, serbisyo indi negosyo ang tinutuyo sang Team El Cid sa ciudad sang Bacolod.
Samtang sa mensahe ni Familiaran, liwat sini nga ginpahayag ang pila ka mga plano kag tinutuyo para sa mga Bacolodnon.
Pila diri ang pagpasanyog sang serbisyo nga ginatanyag sang city health office para sa ikaayong lawas kag pagpatindog sang dialysis center agud buligan ang mga nagakinahanglan kag madamo sang iban pa.
Ang grand rally ang gintambungan sang mga supporters nga nagikan sa nagkalain-lain nga Barangay sa ciudad sang Bacolod.
Secured man ang ginpatigayon nga grand rally bangod madamo man sang mga kapulisan nga nagaseguro sang event.
