Ginklaro sang festival director sang Masskara Festival 2026 ang rasun kun ngaa ginsaylo ang event venue para sa Arena Dance Competition.
Sa interview sang Bombo Radyo Bacolod kay Rodney Ascalon, Presidente sang Bacolod Gugma Foundation, nagpatigayon sang joint inspection ang Bacolod City Engineers Office, Disaster Risk Reduction and Management Office, kag Bureau of Fire Protection sa Paglaom Sports Complex.
Pahayag sang mga ini nga madamo na sang kulang nga rows sa benches kag may mga crack na ang pader, gani indi nagid safe para sa madamo nga tumalan-aw.
Aminado si Absalon nga may mga nagasuhistyon man nga sa Bacolod City Public Plaza na lamang patigayunon ang Arena Dance Competition.
Apang pahanumdom niya nga bag-o lamang na install ang mga lightings kag fountains sa plaza, gani makanugon ang effort para sa rennovation kun palabayan sang mga dalagko nga mga backdraft nga may royda.
Samtang may mga nagasuhistyon man nga sa Panaad Park and Stadium ukon sa University of Negros Occidental – Recolletos (UNO-R) na lamang patigayunon ang event, para sa mas malapad nga area.
Suno kay Ascalon, agud mapabilin ang tradisyon sa Street Dance Competition nga ginahiwat sa Araneta Street, kinahanglan nga malapit lamang ang venue para sa Arena Dance Competition, gani indi pwede ang Panaad nga magakinahanglan pa sang malayo nga pagbyahe.
Nahibaluan nga ang Arena Dance Competition ang patigayunon sa tunga sang SM City Bacolod bridges sa Rizal Street, kag ang mga dancers ang maga-atubang sa baybay.
May italana man nga benches para sa mga tumalan-aw kag mga specified areas para sa media, guests, judges, kag iban pa.
Samtang matapos ang pagsaot, sila ang maga-exit sa San Juan Street balik sa Bacolod City Public Plaza para sa awarding.
