Nagpanawagan ang alkalde sang Bacolod City sa publiko nga likawan ang pagpalapta sang mga litrato kag video sang mga menor de edad kaangay lamang sang mga minors nga gina-alegar nagagamit sang rugby sa Bacolod City Public Plaza.
Suno kay Bacolod City Mayor Greg Gasataya, ang sitwasyon ang indi lang problema sa peace and order bangud ini isa man ka social problem.
Suno kay Gasataya, agud nga masolusyunan ini, nagakinahanglan sang pagbinuligay sang Local Government Unit, mga ginikanan, Department of Social Services and Development kag iban pa nga ahensya sang gobyerno.
Nagpahanumdom ang alkalde nga ang mga menor edad ang may kinamatarong sa privacy kag proteksyon sa idalom sang Republic Act 7610 ukon Special Protection of Children Against Abuse, Exploitation and Discrimination Act.
Dugang pa sang alkalde dapat likawan sang publiko nga maghimo sang mga bagay nga makatuga sang kalainan sa mga kabataan.
Ginaengganyo sang alkalde ang publiko nga kun may nakita nga mga kabataan nga nagahimo sa ginadumulian nga buluhaton, ipahibalo gilayon sa mga otoridad kaangay DSSD sa baylo nga kuhaan sang video kag ipost sa social media.
