Wala pa gihapon madakpan ang tatlo ka mga suspetsado nga nagkastigo kag nagbuno sa call center agent sa Magsaysay Avenue, Brgy Singcang-Airport, Bacolod City.
Ang biktima ang ginkilala nga si Bret Requieron, 29 anyos, residente sang Purok Sigay, sa nasambitan nga Barangay samtang ang nagbuno pa lamang ang ginhingadlan gikan sa tatlo ka suspetsado nga amo si Ajay Austria, residente sang Deca Homes Subdivision, Brgy Cabug, Bacolod City.
Madumduman nga pag-abot sang biktima kapin alas-2:00 sang kaagahon sa parking area, siya ang ginbantayan sang tatlo kag ginkastigo.
Ginbuno naman ni Austria ang biktima sang gina-alegar 15 ka beses kag gingisi ang iya bibig padulong sa dulunggan gamit ang kutsilyo, ginhimuan sang ekis sa guya kag ginkuritan man ang iya agtang.
Sa karun padayun pa nga ginabulong sa ospital ang biktima.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, may identity na sila sang mga suspect kag nakita man ang mga ini sa CCTV nga temprano pa sa parking area.
Ginpadulungan na sang mga kapulisan ang ginatudlo balay sang mga suspetsado apang wala gid sang may nakit-an.
Suno kay Cayao, duha sa tatlo ka suspect ang anay katrabaho man ni Bret sa call center.
Gina-alegar ni Ajay nga may relasyon si Bret kag ang iya anay partner nga nagtrabaho man nga call center.
Si Ajay kag ang babayi ang may-ara naman sang bata, apang ginapahayag nga sila ang nagbulagay na.
Samtang si Bret ang may partner man kag bata.
Ginalantaw nga mahimo gindumtan ni Ajay si Bret kag ini ang ginabasol sa pagbulagay nila sang iya anay partner.
Sa karun lunsay mangatubang ang tatlo ka suspect sang kaso nga frustrated homicide.
Padayun naman ang panawagan sang kapulisan sa mga suspetsado nga magvoluntary surrender agud mapanubo pa ang sentensya.
