Sa pagpangabuhi OK lang magkasala ka bangud wala man sang perfect kag bisan si perpekto ang indi man perfect.
Apang paano kun ang imo sala ang magaresulta sang pagbayad sang milyones?
Kaangay lamang sang isa ka respetado nga pamilya sa UK ang ginbayran sang $100,000 ukon masobra sa P5.5 million sang isa ka restaurant matapos nga gin-akusaran sila nga wala nagbayad sang bill.
Sang Hulyo sang nagligad nga tuig, sanday Peter kag Ann McGirr, upod sa ila mga anak nga sanday Peter Jr kag Carol, ang nagbisita sa The Horse & Jockey Inn sa Peak District, England.
Nag-order sila sang ribeye kag gammon steaks kag nagpamunlaw sang beer nga Ale kag Lagers antes nagpuli sa ila balay sa Omagh, Northern Ireland.
Wala lang dugay nga nakahalin ang mga ini sa nasambit nga restaurant, nag-post sa Facebook ang The Horse & Jockey Facebook nga naga-akusar sa ila nga nagpuli lang nga wala makabayad sang $200 ukon P11,000 nga bill.
Kasunod sini, nangin trending sila kag naguba ang ila reputasyon.
Apang nahibaluan sang ulihi nga nagbayad ang pamilya gamit ang card apang nalipatan sang staff nga i-charge ini.
Makapila ka beses nga pagpangayo sang pasaylo sang restaurant, nagtanyag sang libre nga pagkaon, kag complimentary nga pagtinir sa ila inn apang wala nagpamati ang pamilya.
Sang ulihi, namalayran ang restaurant sang $100,000 sa pamilya nga amo ang nagapanag-iya sang McGirr Engineering nga isa ka kilala nga kompaniya.
