Ginakabig nga isa ka himala ang pag-drive sang isa ka bulag nga lalaki nga yara sa impluwensya sang makahulubog nga ilimnon ilabi na nga wala sang may nasamaran ukon naapektohan sa nasambit nga insidente.
Sang kaagahon sang Hunyo 29, nanotisyaran sang mga otoridad ang isa ka Opel Meriva nga salakyan nga nagabaylo-baylo sang lane sa M6 motorway malapit sa Carlisle, United Kingdom.
Nagpati ang mga patrol officers nga isa lamang ini ka insidente sang hubog nga nagamaneho sa dalanon apang sa ila pagtsekyar, ini ang ila tuman nga ginkakibot.
Natukiban nga ang driver nga ginkilala nga si Anthony Hall, ang wala sang lisensya, wala sang insurance, kag halos bulag na ukon “legally blind” sa sulod sang duha ka tuig.
Santo sa hearing sa korte, nagdesisyon si Hall nga magmaneho padulong sa Scotland matapos makainom sang apat ka botilya sang makahulubog nga ilimnon kaupod ang iya nga asawa.
Ginkuha sini ang salakyan sang iya asawa nga wala sang permiso agud palagyuhan ang tanan nga problema partikular sa kwarta kag relasyon.
Apang, paano ayhan nangin posible nga makamaneho pa sang masobra 241 ka kilometro ukon 150 ka milya sa tunga sang madulom nga kalsada ang isa ka bulag nga indibidwal, dugang pa nga ini ang hubog na?
Paathag ni Hall, may yara pa ini sang light perception sa diin nagasunod lamang ini sa mga taillights sang mga dalagko nga truck sa bug-os nga byahe.
Nagwa man sa imbestigasyon sang kapulisan nga nagdulhog pa ini sa gasolinahan agud magpatughong apang wala man may nakanotisyar nga ini ang bulag kag hubog.
Ginpamatbatan si Hall sang 36 weeks nga pagkapriso ukon masobra walo ka bulan.
Gindumilian man siya nga mag-inom sang makahulubog nga ilimnon sa sulod sang 90 ka adlaw, kag gin-require nga magpaidalom sa rehabilistasyon.
