Ginpatigayon ang simultaneous PNP-Wide Annual Inspection sang mga kagamitan para sa Disaster Response sa Bacolod City Police Office Covered Court kahapon sang aga.
Sa interview sang Bombo Radyo Bacolod kay Police Col. Joeresty Coronica, City Director sang Bacolod City Police Office, gin-inspect diri ang mga nagakalain-lain nga mga equipments kag masiguro nga nagagana ini kaangay sang Loud Hailer, Battery, Flashlight, First aid kit, pala, lagari kag subong man sanitation hygience, safety reflective jacket, safety helmet, rescue stretcher kag iban pa.
Suno kay Coronica, ang event ang ginahimo sang Philippine National Police agud nga makabulig sa kun ano man nga mga kalamidad ang magaabot.
Suno kay Coronica, ginatsekyar ang mga equipments kun functional ukon indi agud nga makahimo sang nagakaigo nga tikang kag mapabilin nga preparado ang mga kapulisan sa pagresponde kun kinahanglan.
Ini ang gintambungan sang 50 ka police personnel nga ginabug-usan sang 42 Police Non-Commissioned Officer (PNCO) kag walo ka Police Commissioned Officer (PCO).
Ang mga nagtambong ang nagikan man sa nagkalain-lain nga police station sa ciudad sang Bacolod kun sa diin nagpadulong sa BCPO dala ang ila nga mga equipments agud tsekyaron.
Ang simultaneous PNP-Wide Annual Inspection ang ginpatigayon dululungan sa bug-os nga Pilipinas nga may tinutuyo nga masiguro nga maayo ang mga kagamitan kag masiguro man nga indi makaapekto sa operasyon sa tion sang kalamidad.
