Nagresulta sa pagkadakop sang duha ka wanted persons ang ginpatigayon nga OPLAN BULABOG sang Bacolod City Police Office (BCPO) sa Purok Sigay kag Kagaykay, Barangay 2, Bacolod City sang Miyerkules sang gab-i, Agosto 12.
Ang duha ka arestado ang ginserbehan sang warrant of arrest sa kaso nga paglapas sa RA 10591 kag Slight Physical Injury.
Nakumpiskar man sa operasyon ang P272,000 nga balor sang ilegal nga druga sa drug buybust operation nga ginpatigyaon sang City Drug Enforcement Unit.
Nakumpiskar man ang pila ka mga motorsiklo nga wala sang plaka.
Sa interview sang Bombo Radyo kay Police Lieutenant Col. Ronnie Brillo Tare, Deputy City Director for Operations (DCDO), ginpahayag sini nga ang OPLAN BULABOG ang kabahin sa SAFE NIR Dial 911 program sang Police Regional Office-Negros Island Region.
Suno kay Tare, tinutuyo sini nga mapasanyog ang anti-criminality drive sang BCPO upod ang tanan man nga mga intervention batok sa kriminalidad sa ciudad.
