Ginpasalig sang spokesperson sang Schools Division of Negros Occidental nga ginaseguro ang safety sang mga atleta nga nakigbahin sa Palarong Pambansa 2025 sa pagpadulong, pagtinir, paghampang tubtob sa ila nga pagpauli.
Sa interview sang Bombo Radyo Bacolod kay Almyr Caezar Dequina, alternate information officer sang SDO Negros Occidental, naghalin ang mga atleta sang Mayo 17 kag nakaabot sa Laoag City, Ilocos Norte sang Mayo 19 kapin alas-2:00 ukon alas-3:00 sang kaagahon.
Sila ang temprano nga nakabyahe gani gilayon ang mga ini nga nakaplastar sa ila billeting school sa San Nicholas National High School.
Ginapasalamat sini ang maayo nga akomodasyon, kag apisar nga may tion nga may problema sa tubig, ini ang madasig man nga ginsolusyonan.
Ang ginapanilagan nila sa karun amo ang problema sa tiyempo, bangod tuman ka init sa nasambitan nga ciudad kag ang Heat Index ang masami yara sa 40 degres Celsius.
Suno diri, sila ang nagpagwa sang division memorandum sa pagtukod sang nagkalainlain nga mga komitiba nga magahatag solusyon sa mga ginapangatubang nga problema.
Monitored man ang paggwa kag sulod sang mga kabataan sa billeting schools, samtang may nagadul-ong sugat man nga transportasyon padulong sa mga playing venues.
Ang opening ceremony ang patigayunon sa Sabado, Mayo 24, kag ang aktibidad ang hiwaton sa hapon agud wala sang init.
Ang hinampang ang maga-umpisa naman Mayo 24 tubtob sa 31, apang ang Negros Occidetal delegates ang Mayo 26 pa magahampang.
Para kay Dequina, makabig historic ang Palarong Pambansa 2025, bangod ini ang ulihi nga tuig nga makaupod ang Negros Occidental sa Western Visayas.
Parehas man nga yara kag nagapartnership ang duha ka Regional Directors sang Department of Education Western Visayas kag Negros Island Region.
Nakaligad nga tuig ang Western Visayas ang 2nd runner up.
Nakuha sang Region 4A ang 1st runner up samtang ang kampyonato ang napauli naman sang National Capital Region.
Ini ang makabig challenge sa mga kabataan nga makuha ang kampeonato.
