May mga imposible gid nga mga bagay nga kun kaisa ang nagakatabo apang nagakatabo kaangay lamang sang isa ka flight nga may sakay nga 199 ka mga pasahero kag anum ka crew members.
Gikan ang flight sa Frankfurt, Germany kag pakadto sa Seville, Spain.
Suno sa Civil Aviation Accident and Incident Investigation Commission sang Spain, nagwa ang piloto sa cockpit kag nagkadto sa lavatory samtang ginbilin naman sini ang pagmaneho sang eroplano sa iya nga co-pilot.
Apang sa wala mahibaluan nga rason gulpi lang nalipong ang co-pilot samtang wala pa nakabalik ang iya upod.
Santo sa report sang komisyon, may mga nabatian pa sa voice recorder nga mga huni sang gulpi lang nga nalipong ang piloto nga yara sa cockpit.
Nagtinguha ang air traffic controller sang tatlo ka beses agud nga malab-ot ang co-pilot apang wala gid sang nagasabat.
Samtang, sang nakagwa na halin sa bathroom, gintinguhaan sang isa ka piloto nga buksan ang puertahan sa cockpit sang lima gid ka beses gamit ang standard code apang indi ini magbukas.
Bisan nga nagbutang na ang cockpit crew member sang intercom call sa flight deck, gina-deny sa gihapon ang access.
Bangud sini, gingamit na lang sang kapitan ang emergency code agud nga makakuha liwat sang access sa eroplano.
Suno pa sa report sang komisyon, dali-dali man nga ginhatagan sang first aid ang co-pilot sa bulig sang crew kag doctor nga isa sa mga pasahero sa nasambit nga flight.
Kapin napulo man ka minutos nga naglupad ang eroplano nga wala sang piloto, apang maswerte lang nga wala sang malain nga natabo. Ginpahugpa anay ang eroplano sa lain nga lugar agud nga madala sa ospital ang co-pilot.
Sa pagpangusisa sang doctor, natukiban nga nalipong ang co-pilot bangud sa preexisting neurological condition nga wala siya nakahibalo nga gina-suprer niya ilabi na bangud wala man ini na-detect sa iya nga aeronautical medical examination.
Kasunod sang hitabo, ginsuspinde anay ang iya nga medical certificate.
Nagpasalig naman ang kumpaniya nga maga-kooperar ini sa imbestigasyon sang Spanish authorities, magluwas pa sa kaugalingon nga imbestigasyon sang ila nga safety department.
