Nagapanawagan ang bise alkalde sa banwa sang EB Magalona, Negros Occidental nga likawan ang pagbakal sang illicit cigarettes bangud wala ang mga ini nag-agi sa husto nga proseso agud mapasulod sa pungsod kag wala nagabayad sang buwis sa pungsod.
Ini ang kasunod sa nagdangat sa P2.8 million ang balor sang narecover nga smuggled nga sigarilyo sa higad sang Malogo river sa Barangay Pasil, EB Magalona sang Martes sang gab-i.
Sa interview sang Bombo Radyo Bacolod kay Vice Mayor Eric Matulac, nakabaton ang mga kapulisan sang impormasyon nga may bodega sa lugar kun sa diin nahamtang ang mga smuggled nga sigarilyo.
Ginapahayag sang mga mananagat nga madamo sang mga pump boat nga nagapadulong sa payag nga napalibotan sang mangrove.
Sa ginpatigayon nga operasyon, natigayon nga marecover ang 140 ka karton sang isa ka brand sang sigarilyo.
Yara sa kustodiya sang kapulisan ang naabtan nga caretaker nga si alyas ‘Marciano’, 67 anyos, kasado samtang ang upod naman sini nga si alyas ‘John Mark’, 32 anyos nahimo nga makapalagyo.
Sila ang lunsay mga residente sang Daan Banwa, Barangay 9, Victorias City.
Pasakaan naman sang kaso ang duha ka caretaker sa pagbayolar sa Section 263 Unlawful Possession or Removal of Articles Subject to Excise Tax without Payment of Tax NIRC of 1997 as Amended.
Suno kay Matulac paagi sa pagintercept sang nasambit nga smuggled nga sigarilyo mapahagan-hagan ang paglapta sini.
Nagapanawagan nga likawan ang pagpatronize sang illicit cigarettes bangud ini ang wala nagabayad sang buwis sa pungsod.
Nagalaom man ini nga ang pagintercept sang nasamabit nga smuggled cigarettes ang makahatag sang paandam sa mga tawo nga nagapalusot sang kaangay nga produkto ang indi nalang pagpadayunon agud nga malikawan man nga madakpan kag mapasakaan sang kaso.
