Hugot nga ginabantayan sang mga kapulisan ang pagsulod sang mga smuggled nga sigarilyo paagi sa mga sea ports.
Sa interview sang Bombo Radyo Bacolod kay Police Regional Office – Negros Island Region spokesperson Police Lt Col Joem Malong, ginalantaw nila nga padayun ang paglapta sang illegal nga sigarilyo sa rehiyon, bangod dako ang ila maganar sa illegal nga produkto.
Ini bangod dako nga bahin sa presyo sang mga lehitimo nga sigarilto ang nagakadto sa buwis, nga amo ang ginagamit sa mga proyekto sang gobyerno kaangay sang health care services kag mga infrastructure projects.
Bangod wala nagabayad sang taxes ang mga illegal nga produkto, gani ini ang mabaligya sang barato, apang dako gihapon ang income sang negosyante.
Target naman masami sa pagbaligya sang illicit cigarettes ang mga lokal nga komunidad nga malayo sa mga sentro sang banwa kag ciudad, kaangay sang kabukiran.
Suno kay Malong, natumod na nila sang tinalikdan ang illegal manufacturing sang illegal nga sigarilyo sa Negros Occidental, gani sa karun sila ang nagatutok naman sa mga nagasulod nga gikan pa sa iban nga lugar.
Isa sa mayor nga ginatutukan ang gina-alegar pagsulod sang illegal nga sigarilyo gikan sa Mindanao.
Gani hugot ang ila monitoring sa mga sea ports agud gilayon nga ma-intercept ang mga kontrabando antes pa magdangat sa komunidad.
