15 ka sachets sang suspected shabu ang nakuha gikan sa napudyutan nga pouch sa Purok Mahimulaton, Barangay Banago, Bacolod City kaina sang kaagahon.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, ang brown nga pouch ang napulutan sang Revitalized Police sa Barangay (RPSB).
Gilayon man nga nagcontact ang personnel sang Barangay sa kapulisan, kag gin-inventory ang 15 ka small heat-sealed transparent plastic sachet sang suspected shabu nga gin-witness man sang media kag Barangay official.
Wala naman matumod kun sin-o ang tag-iya sang pouch, bangod magluwas sa suspected shabu, P600 cash lamang ang unod sini kag wala sang ano man nga identification.
Ginalantaw sini nga gikan sa isa sa mga nagaduso sang illegal nga droga sa lugar ang nakit-an nga pouch.
Ang mga suspected shabu ang isumiter naman sa crime laboratory para sa verification.
Pasalig ni Tapang nga padayun ang ila paglagas sa mga nagapatigayon sang illegal nga transaksyon, samtang ang kapulisan ang nagakinahanglan man sang kooperasyon sang pumuluyo.
