Ginapabutangan sa karun sang mga fire extinguisher ang tanan nga merkado sa ciudad sang Bacolod.
Ini ang kabahin sa requirement sang Bureau of Fire Protection ilabi na nga may ginapangatubang nga Super El Niño.
Sa interview sang Bombo Radyo Bacolod kay Bacolod City Mayor Greg Gasataya, may-ara na sang nabutang nga 75 ka fire extinguisher sa Bacolod Central Market.
Gina-amat amat naman sa karun ang sa Libertad Public Market kun sa diin kalakip sa butangan bisan ang Annex Building nga wala pa sang okupante; nga pagasundan sang Burgos Public Market.
Matapos sa tatlo ka mayor nga merkado, asikasuhon naman ang pagbutang sang fire extinguisher sa mga magagmay nga merkado sa ciudad.
Pinaagi sini, mas makapangaman kag may madasig nga access ang mga vendors sa tion sang sunog, nga makahatag man sang kahilwayan sa mga bumalakal.
Luwas diri, gina-asikaso man sang ciudad ang iban pa nga bulig sa merkado kalakip na ang amnesty program.
Ginatinguhaan nila nga ma-award na sa mga tenants ang mga stalls sa una nga semana sang Disyembre para sa mga market vendor nga wala sang complaints, apang ang mga may complaints ang dapat nga maresolbar anay.












