Nakilal-an na ang bangkay sang isa ka lalaki nga naputos sa garbage bag kag ginapatihan ginhal-id sa irigasyon sa Prk Kapayas, Brgy Pacol, Bago City pasado alas-5:00 kaina sang aga.
Sa interview sang Bombo Radyo kay Plt Col. James Latayon, hepe sang Bago City Police Station, may inisyal na sila nga identity apang ginahulat pa nila ang positibo nga pagkumpirmar sa pamilya sang biktima.
Ang biktima ang taga Bacolod City.
Ini ang natumod sang iya pamilya paagi sa mga tattoos sini sa lawas nga ginlakipan sang pangalan nga “Rose Mary” sa iya nga dughan, kag “Cardeñas Pablo” sa nawala nga butkon.
Suno kay Latayon, may nakita nga pilas sa tiil kag tuhod sang biktima.
Gina-alegar man nga ini ang ginluthang bangud may narecover nga basiyo sang bala sa crime scene.
Gina-usisa man nila ang gina-alegar gunshot wound nga nakita sa ulo sang biktima.
Ginalantaw sini nga dako ang posibilidad nga sa iban nga lugar ginhimo ang krimen kag ginhal-id lang ini sa irigasyon.
Ini bangud suno sa iya, wala sang may nabatian ang mga pumuluyo nga lupok ukon gahod sa lugar.
Gina-imbestigaran man nila ang nasiplatan nga isa ka pickup sa lugar kapin ala-1:00 tubtob alas-2:00 sang kaagahon.
Suno kay Latayon, nagrequest na sila sang autopsy sa bangkay sang biktima apang nagpamalimad ang utod sini.
Dugang pa, ang biktima ang may record sa Bacolod Police Station 1 sang Nobyembre 2 kag halin sadto wala na ini nakita sa ila nga lugar.
Panawagan ni Latayon sa mga pumuluyo nga mahimo may impormasyon antes nadula ang biktima nga makig-angot sa mga kapulisan agud makabulig sa ila imbestigasyon.
Samtang, ginpahayag naman ni Pmaj. Eugene Tolentino, Chief of Police sang Bacolod Police Station 1, nakig-angot na sa ila ang Bago City Police Station kag nahatag na nila ang impormasyon natuhoy sa record sang biktima.












