Nagtaliwan na ang angkas sang napatay nga driver sang motorsiklo nga isa ka Criminology graduate matapos mabungguan sang truck sa Hacienda Guikay, Barangay Purisima, Manapla, Negros Occidental sang Hunyo 13 sang kaagahon.
Madumduman nga ang driver nga ginbawian sang kabuhi ang ginkilala nga si Rolando Moldes III alyas Robot nga bag-o lamang nakagradute sa kurso nga Criminology.
Part of Interview with Police Captain Marion Vicente Villaflor, Deputy Chief of Police sang Manapla Municipal Police Station
Sa interview sang Bombo Radyo Bacolod kay Police Captain Marion Vicente Villaflor, Deputy Chief of Police sang Manapla Municipal Police Station, nagtawag ang tiya sang biktima sa imbestigador sang nasambit nga police station kag nagpahibalo nga napatay na ini kaina sang kaagahon, Hunyo 18.
Nahibaluan nga ang nagtaliwan ang backrider sang napatay nga driver sang motorsiklo nga isa ka Criminology graduate.
Gin-abisuhan man sang mga ini ang tiya sang biktima nga magpadulong sa police station para nga magpablotter agud nga marecord nga na-expire naman ang angkas sang napatay nga Criminology graduate.
Ginpahayag man nga may inisyal nga pag-estoryahanay sa tunga sang driver sang truck kag sang pamilya sang mga biktima.
Una na nga ginpahayag sa Bombo Radyo Bacolod ni Police Major Robelito Mariano, hepe sang Manapla Municipal Police Station, ang motorsiklo ang padulong sa Cadiz City samtang ang truck ang padulong naman sa Victorias City.
Sa imbestigasyon, natumod nga ang motorsiklo amo ang nagtabok sa lane sang truck nga nagazigzag ang dalagan, gani sila ang nabungguan.
