May person of interest na ang kapulisan sa mahimo nagpatay sa 38 anyos nga iloy, nga nasapwan nga wala na sang pang-idalom nga panapton sa Sition Capayas, Brgy Sicaba, Cadiz City kahapon.
Madumduman nga ang biktima ang ginkilala nga si Jenny Ann Delano, 38-anyos, kasado, may isa ka bata nga babayi kag residente man sa lugar.
Sa interview sang Bombo Radyo Bacolod kay Police Lt Daleen Grace Loreno, Deputy chief of Police sang Cadiz City Police Station, may-ara na sila sang person of interest nga sa karun padayun nga ginamonitor sang kapulisan.
Nagapanawagan man ini sa mahimo nakawitness sa krimen nga magbulig, agud magbakod ang ebidensya nga makatudlo sa suspect.
Nahibaluan nga magalakat kuntani ang mag-asawa agud magkuha sang kwarta sa lending.
Apang ang bana ang nagpatughong pa sang motorsiklo sa proper gani temporaryo sini nga ginbilin ang iya asawa sa waiting shed.
Apang sa pagbalik sang bana kapin alas-12:00 sang udto kahapon, wala na ang iya asawa.
Ini ang ginpangita nila sang iya bata, tubtob nga nasapwan ang tsinelas sang biktima, kag sunod nga nakita ang bangkay, nga wala na ang pang-idalom nga panapton.
Ang biktima ang may pilas sa ulo tuga sang pagpanglampos, nga ginalantaw gamit ang bunga sang lubi.
Ang bangkay ang nasapwan kapin 300 metros gikan sa waiting shed, kag 15 tubtob 20 metros gikan sa Barangay road, sa bahin sang mga kalubihan.
Ginpaidalom na sa post mortem examination ang bangkay, kag ginahulat na lamang ang resulta.
Samtang ginswab man ang iya kinatawo, bangod wala ginadula ang posibilidad nga ini ang ginhimuslan.
