Nagdangat sa 112 ka mga nagpapili sa 2025 Midterm Elections sa Negros Island Region ang wala nagfile sang Statement of Constributions and Expenditures (SOCE).
Sa pahayag ni Commission on Elections – Negros Island Region (Comelec-NIR) Director Atty Lionel Marco Castillano, 1,557 ang kabug-usan nga kandidato nga nagfile sang Certificate of Candidacy sa bilog nga NIR.
Sa layi, tanan nga nagkandidato, nagdaog ukon napierde kag bisan ang nagwithraw ang required nga magsumiter sang SOCE.
Sa 1st offense, ang kandidato ang mangatubang sang administrative charges depende sa pwesto nga ginpadalaganan, kag mas mabug-at nga fine kun bal-ot bal-ot nga wala nagasumiter sang SOCE.
Apang kun duha na ka magkasunod nga eleksyon nga wala nagfile sang SOCE, magafile sang complaint sa Comelec en banc kag mahimo nga dagdagan sang perpetual disqualification to hold public office ang nasambitan nga mga kandidato, ukon indi na mahimo magkapot pa sang bisan ano nga pwesto sa gobyerno.
Sa 1,557 ka nagfile sang COC sa NIR, 1,445 lamang ang nagfile sang SOCE, nga nagakahulugan nga may 112 nga wala nagcomply.
Nagtakop ang filing sang SOCE sang Hunyo 11.
Ang Negros Occidental ang may pinakadamo nga wala nagsumiter kun sa diin sa 778 nga kandidato, 703 lamang ang nagfile sang SOCE, gani may 75 nga wala nakasumiter.
Sa 617 nga kandidato sa Negros Oriental, may 589 nga nagfile gani may 28 nga wala nakafile sang SOCE.
Samtang sa 162 ka kandidato sa Siquijor, 153 ang nagfile ukon may siyam nga wala nagfile sang SOCE.
Pahanumdom ni Castillano nga isa-isa pa nga tsekyaron sang Comelec ang SOCE sang mga kandidato agud maseguro nga husto ang mga attachments kag wala sang overspending.
Ang overspending ang isa ka election offense kag magaresulta man sa perpetual disqualification to hold public office.
Samtang bisan nga nagdaog sa eleksyon kun wala nagsumiter sang SOCE, ang kandidato ang indi maka-assume sa pwesto.
Ini bangod may kasugtanan na ang Comelec kag Department of the Interior and Local Government (DILG) kun sa diin isa sa requirement antes makapatigayon sang oath of office ang certificate nga nakasumiter na sang SOCE
