Natumba ang isa ka mini dump truck sa kilid sang dalan sa bahin sang Barangay Guimbalaon, Silay City.
Interview with John Rey Pares, Barangay Kagawad sang Barangay Patag, Silay City
Sa interview sang Bombo Radyo Bacolod kay Johnrey Pares, Barangay Kagawad sang Barangay Patag, Silay City nga una nakaresponder, apat ang nakita sini nga unconscious samtang yara naman sa 12 ang nasamaran gikan sa masobra 20 ka mga sakay sang mini dump truck.
Iban sa mga ini ang gintabunan na lamang sang dahin sang saging.
Sa initial investigation sang Silay City Police Station, pito ang kumpirmado nga napatay sa aksidente, lima ang kritikal ang kondisyon kag 13 ang nag-angkon sang minor injury.
Ginapahayag nga ang mga sakay ang lunsay mga empleyado sang Silay City nga sakay sa mini dump truck sang City Engineer’s Office.
Ang mga ini ang gikan sa tree planting activity nga ginpatigayon sa Sitio Lantawan sa nasambitan nga Barangay.
Pahayag sang bantay sa tyangge sa atubang lamang sang incident sit, madasig ang dalagan sang dump truck.
Nakaprino pa ang dump truck bangod sa skid mark nga nakita, apang ginalantaw nga indi masarangan sang prino gani agud indi magderetso panaog kun sa diin may-ara sang pil-as, nadesisyonan sang driver nga ibunggo na lamang sa concrete nga gutter.
Apang sa baylo nga magpundo, ang royda ang nagsaka kag natumba ang dump truck.
Suno kay Pares, iban sa mga sakay ang naglalabog bangod sa aksidente.
Samtang sa interview sang Bombo Radyo Bacolod kay Alyas Aime, tag-iya sang tyangge sa atubang sang accident site, nagapanghugas ini sang pinggan sang nabatian ang paghuganas kag paglinagabong.
Gilayon naman ini nga naggwa kag nakita nga nagalapta na sa dalan ang mga biktima samtang tumba naman ang dump truck.
Suno kay Aime lima ang ginalantaw sini nga napatay sa aksidente nga ginalakipan sang apat ka lalaki kag isa ka babayi kalakip na ang yara sa passenger seat nga dead on the spot.
Pahayag sini alas-7:00 sang aga sang maglabay ang madamo nga salakyan sang ciudad para sa tree planting activity.
SAMTANG… Nagakalisod ang pamilya sang mga ginbawian sang kabuhi sa pagkatumba sang mini dump truck sa Sitio San Juan, Barangay Guimbalaon, Silay City.
Nahibaluan nga pito ang napatay, lima ang kritikal ang kondisyon kag 13 ang nag-angkon sang minor injury sa nasambitan nga aksidente.
Sakay sa nasambitan nga dump truck ang 24 ka mga Job Order casuals gikan sa Silay City Government nga nagpatigayon sang tree planting activity sa Sitio Patag sa nasambitan nga ciudad.
Sa interview sang Bombo Radyo Bacolod kay Julie Ann Ortiz, manghod sang napatay nga si Jerson Leonillo, 39 anyos, sang mahibaluan ang aksidente, una sila nga nagtsekyar sa mga ospital nga gindal-an sang mga biktima, apang wala makita si Jerson.
Ang narecover lamang nila amo ang wallet sini, tubtob nga may nagpahibalo nga may isa pa nga wala na-identify sa mga nagkalamatay.
Gani ginpadulungan nila ang Manapla Funeral Homes kag didto nakumpirmar nga isa si Jerson sa mga napatay.
Suno kay Julie Ann, madugay naman nga nagatrabaho ang iya magulang bilang plumber sa Silay City Engineer’s Office.
Ang asawa sini ang nagatrabaho sa Manila kag sila ang may kapid nga kabataan nga napulo ka tuig ang edad kag Grade 6 pupils na sa karun.
Nagahingyo na lamang ini sang bulig para sa pagproseso sang bangkay sang iya magulang.
Samtang wala na sang plano nga magpasaka sang kaso ang iloy sang napatay nga si Rafael Jardiolin, single, caretaker sang Silay City Gym.
Sa interview sang Bombo Radyo Bacolod kay Raquel Jardiolin, ang nobya sang ila nga apo amo ang nakapahibalo sa ila natuhoy sa insidente.
Suno diri, nakalisensya si Rafael antes maghalin, kag ini ang masami gid nga naga-upod sa mga kaangay nga aktibidad sang ciudad.
Nagapati ini nga indi hungod sang driver ang aksidente gani wala nila ini ginabasol kag wala man sang rasun para sa ila para magpasaka sang kaso.
