Padayun ang monitoring sang Silay City Government sa kondisyon sang mga pasyente kasubong man ang paghatag sang bulig sang mga nalisdan nga pamilya sa pagka-aksidente sang mga empleyado sang ciudad kahapon.
Madumduman nga pito ang napatay gikan sa 24 ka sakay sang mini dump truck sang Silay City Engineer’s Office nga natumba sa Sitio San Juan, Barangay Guimbalaon, Silay City matapos lamang sang ila tree planting activity.
Sa interview sang Bombo Radyo Bacolod kay Silay City Vice Mayor Tom Ledesma, kaupod sila ni Mayor Joedith Gallego sa tree planting activity sa Sitio Lantawan sa Northern Negros Natural Park apang nag-una pauli ang alkalde bangod ini ang gikan pa sa Iloilo kag wala pa sang tinulugan.
Yara pa ini sa site sang maglab-ot sa ila ang impormasyon angot sa aksidente.
Nagab-ihan man ang mga ini sa paglibot sa mga ospital kun diin gindala ang mga pasyente agud mahibaluan ang ila kondisyon, kasubong man ang pagpalab-ot sang bulig sa mga nalisdan.
Ang city government man ang nagaproseso sa mga requirements para sa hospital bills sang mga pasyente.
Sa karun, apat ka pasyente nalang ang nagapabilin nga kritikal ang kondisyon nga yara sa pribado nga ospital sa Bacolod City.
Sa thanksgiving activity ni incoming Negros Occidental 3rd District Congressman Javi Benitez kahapon, siya ang nagpasalig man sang bulig sa mga biktima.
Ang city government man ang maga-abaga sang gasto sang mga nalisdan gikan sa paghimos sang bangkay tubtob sa pagpalubong.
Bisan sa mga nakagwa na sa ospital, ang city government ang may ara man sang intervention para sa emotional recovery nga matuga sang trahedya.
Sa pihak nga bahin, nagapati ang bise alkalde nga indi overloaded ang mini dump truck.
Suno kay Ledesma, ang nasambitan nga salakyan ang gamit sang Water Task Force sang City Engineer’s Office kag masami man nga ginapasaka sa bukid.
Magluwas sa mga personnel, ang mini dump truck ang masami man nga ginakargahan sang mga equipments kaangay sa mga tubo nga ginagamit sa pagtukod sang deepwell kag nagakarga man sang mga balas kag gravel
Suno kay Ledesma, ang load capacity sang mini dump truck ang nagadangat sa lima ka tonelada.
Ginalantaw sini nga mahimo nadulaan sang prino ang truck kag bangod sa dulhugon ang area, may karga kag madasig ang dalagan, gani nagluntad ang trahedya.
