Padayon nga nagsaka ang mga presyo sang residential property sa pungsod sa una nga quarter sang tuig apang mas mahinay ang kadasigon sini kun ipaanggid sa pagsaka nga narekord sa ikaapat nga quarter sang 2024, suno sa Bangko Sentral ng Pilipinas (BSP).
Sa isa ka report nga gin-release sang Biyernes, ang BSP nagpahayag nga ang Residential Property Price Index (RPPI) sa bug-os nga pungsod ang naghinay gikan sa 9.8 porsyento sa ikaapat nga quarter sang 2024 nangin sa 7.6 porsyento sa una nga quarter sang 2025.
Ang National Capital Region (NCR) ang nakarekord sang pinakamataas nga pagsaka sa sulod sang period nga nagdangat sa 13.9 porsyento.
Para sa mga lugar sa gwa sang NCR, ang presyo sang real property ang nagsaka sang 3 porsyento.
Ang presyo sang condominium unit nagtaas sang 10.6 porsyento, samtang ang presyo sang balay nagsaka sang 4.5 porsyento.
Ang Residential Property Price Index (RPPI) isa ka talaksan sang average nga pagbag-o sa mga presyo sang mga nagkalainlain nga sahi sang mga housing units sa pagligad sang panahon, base sa datos gikan sa mga bangko sa aktwal nga mga pautang nga ginhatag para sa pagbakal sang mga residential property.
Isa ini sa key indicators nga ginabantayan sang BSP sa pag-usisa sang mga kondisyon sang merkado sang real estate ssang pungsod.
