Natapos na ang construction sa intersection sang Bacolod-Negros Occidental Economic Highway (BANOCEH) padulong sa Barangay Granada, Bacolod City apang sa Domingo pa natalana buksan ang dalan.
Sa interview sang Bombo Radyo Bacolod kay Department of Public Works and Highways (DPWH) – Bacolod City Head Engr. Leah Jamero, natapos na ang proyekto sang DPWD Region 6 sa tunga sang dalan.
Sa karun, yara pa gihapon ang mga barikada, agud maseguro nga mala nagid ang semento antes buksan kag malabyan sumugod sa Domingo.
Madumduman nga ginkay-o ang dalan makaligad sang mga aksidente kasubong man matapos ang madamo nga mga reklamo bangod sa street light nga yara sa tunga sang intersection.
Ang road work ang nagtuga naman sang pagbug-at sang trapiko sa lugar partikular na sa rush hour period.
Magluwas sa pagkay-o sa dalan, ang DPWH Region 6 ang magahamtang man sang traffic light sa area para sa mas masulhay nga dalagan sang trapiko.
Ini bangod sa karun, nagahangpanay lamang ang mga nagalabay sa intersection sa pagtabok, bangod wala sang traffic light.
Suno kay Jamero, ini ang indi naman makatuga sang peligro bangod sa higad sang dalan na ihamtang ang traffic ligjt.
Ginalantaw sini nga masuguran ang trabaho sa mid-July kag matapos antes magtakop ang bulan sang Hulyo.
Nagapati si Jamero nga madasig lamang ang pagtrabaho bangod yara naman ang poste kag equipment gani pagtakod kag programming na lamang ang kinahanglan nga himuon.
Nagalaom ini nga sa pagbukas sang dalan kag pagbutang sang traffic lights, masolusyonan na ang problema sa trapiko sa nasambitan nga area.
